???
كأس العالم وخرفان منّاوي
دراسة الاثر الاقتصادي
بقلم/ صبري محمد علي (العيكورة)
تداولت بعض المواقع الإخبارية (الأيام الفاتت) أن (ولدنا) القائد منّي أركو مناوي حاكم إقليم دارفور تبرع او سيتبرع (حقيقة مش عارف الحكاية دي تمت واللا لسه) يتبرع لدولة قطر الشقيقة بعدد (٣) ألف رأس من الخراف مساهمة منه في فعاليات كأس العالم التي ستنطلق شهر نوفمبر القادم بالدوحة
(أو حاجة بالشكل ده) .
(أوول حاجة) نشكر السيد الحاكم على هذا الشعور والمساهمة الكبيرة والحمد لله إنها جات باسم (ولدنا) مناوي ولم يعلن عنها باسم الشعب السوداني وإلا فكانت ستكون (كارثة العصر) حا تقول لى ليه يا أستاذ ؟
أقول ليك أنا …..
(آآآى) نعم القائد ما قصر و يشكر على مشاعره و كلامه الطيب تجاه دولة قطر .
لكن في معلومات لازم نوضحها وأنا نفسي أعرف المستشار (الفلتة ده) الذى أشار على السيد القائد بهذه الفكرة (الجهنمية) ولو إنه حسب متابعتى لولدنا مناوي (مااا) اظنه محتاج لمستشارين (كتار) فالزول ده الاحظ عليه كثيراً من الصفات (القذافية) سواء في طريقة لبسه او مفرداته و (السماء ذات البروج) إحدي تلك التجليات ده غير قصة الثعلب والنعامة واللالوب .
على كل حال …..
أقول (لولدنا) مناوي …
يا إبني ده كأس عالم يعني دى ما حولية (الشكينيبة) يعني بمعنى آخر الدولة المضيفة ليست مسؤولة عن إطعام زوار المهرجان بل بالعكس تماماً هي فرصة (بزينس) محسوبة بدقة ولذا كل الدول المقتدرة تتنافس على إستضافة هذه الفعالية ذات الشروط والمعايير القاسية جداً .
فدولة قطر انفقت في سبيل إحتضان هذه الفعالية اكثر من (٢٢٠) مليار دولار ! انفقتها على البنية التحتية من طرق وفنادق ومدن عائمة و وسائل النقل و نشات عدد (٨) ملاعب مكيفة (إنتا فاهمني) ؟
ومتوقع ان يزور قطر اكثر من مليون ونصف زائر واذا أضفنا لهم القطريين والمقيمين
(فبالميييت كده)
الحكاية دى بتعمل ليها ثلاثة مليون تقريباً وهناك إحتمال من ان تستفيد السعودية والامارات أيضاً من هذه (البهيلة) حا تقول لى كيفن ؟ لانه يا صاحبي (قطر) بلد صغيرة و قد يكون السماح للزوار بالاقامة خارجها هو احد الحلول مع توفير خدمة المواصلات المجانية يعني بالعربي كده الفنادق والمطاعم والميادين (حا تكون فُل) .
(طيب) يا ولدنا خرفانك دى يودوها وين ؟ إذا كان البلد ما شايله الضيوف !
واللا أقول ليك …!
نفترض (تب) القطريين إستلموهن وضبحوهن يكفن منو ويخلن منو؟
(أأأي نعم) ممكن نطلع (منهِن) بتلاتة الف رأس (نيفة) وستة الف وجبة كوارع وقول (الكومنية والكِبد) عملت لينا عشرة الف وجبة وباقى الخرفان ضلع مع الرز (قووول تب) عملن معانا عشرين الف وجبة يعنى (التوتل) (حا) يكون تسعة وثلاثين الف وجبة ياخى قول (٥٠) الف وجبة (اها) باقى الضيوف ياكلو شنو يا منّاوي ؟
يا جماعة ……
شفتو زى الشبحة دى دون الرجوع للحكومة المركزية هي واحده من (خوازيق) إتفاقية (جوبا) التي تخول لدارفور إستجلاب الاستثمارات وبالتالي بناء العلاقات الخاصة (دايركت) مع الدول الاخرى دون الرجوع للخرطوم و(أهوو) شايفين (برااكم) نوعاً من أنواع تلك العلاقات الخرافية و (الخرفانية) !
ياجماعة قبل ما تكون الشغلانة (قسيم مرارة) أهلوا الناس ديل فهموهم ، أدوهم كورسات في علم المراسم والأستقبال وفن الهدايا يا جماعة ما معقول لكن توصلونا لنوع الفهم ده .
ياخ أقوليكم حاجة …؟
هل تعلموا ان كأس العالم القادم في ٢٠٢٦ م ستستضيفة ثلاثة دول هي كندا وأمريكا والمكسيك ! يعني الشغلانة إمكانيات وإستثمار وناس جاهزة موية و زيت ما (خرفان) يا جماعة !
قبل ما أنسي : ــــ
ولكن ….
تظل تكلفة كأس العالم هذا العام هي الأعلى في تاريخه إذ بلغت (٢٢٠) مليار دولار وبعد هدية حاكم إقليم دارفور ستصبح (خسارة) قطر (٢٢٠) مليار دولار زائداً ثلاثة الف خروف !
الثلاثاء ٤/ اكتوبر ٢٠٢٢م
