🦻🏼🥱
ده الكلام الطقش اضاني غايتو
بقلم/ صبري محمد علي (العيكورة)
يوم امس الاول كتبنا مقالا بعنوان(الحكاية ومافيها يا عب باسط) تناولنا فيه السيناريو الذي نشاهده من ان هناك تسوية مع قحت (ون) والعسكر وقلنا وبناءا على تصريحات (عمنا) البرهان انو ده (كلام ساكت) و لا يلامس الحقيقة
ولكن ….
وللاسف (كمان)
الموضوع شكلو جاي جاي !
قول لى من وين جبت الكلام ده ؟
اولا يا صاحبي عشان تربطوا الخيوط ركزوا معاي فى تصريحات (الفكي) الايامات دى ! بعد زيارته لامريكا كلها والله ياجماعة (طنط) امريكا قالت ستستأنف دعم السودان ولكن ليس قبل ان يُسلم الحكم لحكومة مدنية ! ومش عارف وعدونا بكذا وكذا ان نحن فعلنا ذلك .
(طيب) امريكا دي ….
بتدعم منو ياجماعة والبحقق مصالحها منو؟
(القحاطة) طبعا و من خلفهم فولكر ومسودة دستور لجنة المحاميين التسييرية الشيوعية ! صاح؟
(طيب) اذا موضوع التسوية (فعلن) ماشي وكلام البرهان القال ما معناهو (بالتقطعوا) مافى تسوية مع طرف آخر بقى فيهو قولان ! انا ما عاوز اقول الزول ده (كضاب) لا لا حاشا لله ونربأ بقائد جيشنا من ذلك و لكن بصراحة كده كلام الفكي (بخوف)
واذا ربطنا الخيوط قد نفهم الى اين يقودون الوطن او ان شئت كيف سيقدمونه على طبق من ذهب للقحاطة
فليس من المعقول كل ما طلعت شمس يوم جديد الفكي (شايل الكمنجة) فى الموال ده ساكت ! امريكا قالت وقالت .
سنة كااااملة …
اوقف التنمية عطل التخطيط الاقتصادي والناس صابرين وفى آخرتها تجيب ليهم قحط من الشباك؟ (لا) و كمان بلا خجلة (مادي ايدو) لامريكا منتظرها !
اكيد الخزينة فاضية عدمانة التكتح !
والحل بيد من يدفع ومن يدفع باشارة اصبع هى الامارات و لا بد ان تمرر اجندة الغرب تحت اى مسمى …! واللا انا غلطان ؟
و (اهو براااكم شايفين الحاصل) كل المبادرات داخل فريزر ثلاجة القصر ..
و الكلام الما بتكتب كتير لكن الزول (معصوووور) واصحاب المبادرات إن لم يتحركوا سريعا ويحركوا الشارع ضد اى حكومة مستوردة فسيكتمل مشروع (القحطنة) وسيستفيدوا من اخطاء الماضى ! وسنعود تقهقرا الى الوراء حيث توقفت قحط الثانية الاخرى ليكمل مشروع تغريب وتفتيت السودان وسلخ الناس عن دينهم ومبادئهم وقيمهم .
فهل من اهل المبادرات من يفهم اين تقف مبادراتهم و ماذا فُعل بها؟
ولكن قطعا …..
تظل ارادة الشعوب هى القوة التى لا تقهر ولن تستطع قوة مهما عظمت ان تفرض عليها ما تريد طالما توحد الشعب و سلك الطريق الذى يرتضيه بعزيمة واصرار .
(وليد) ود السرة بت حاج عثمان ولد مدلع (خااالس) ويثير المشاكل والفتونة والصبينة داخل ازقة الحلة … و(لانو) امو زولة لسانها طويل فكان الناس يتحاشون الصدام معها فيلجأون لوالده الرجل الطيب حاج كرار ود حاج الضو .
فتجمع الرجال ذات يوم وذهبوا اليه فى ديوانه يشتكون اليه ازعاج ابنه وحاجة بالشكل ده !
فاستحى من انداده ولكنه كان صريحا معهم بقوله :
(ياجماعة انتو براااكم عارفين البير وغطاهو) …!
فالكلام ده اعفوني منو
اهاا ده كلام شنو يا حاج كرار! البتقول فيهو ده ياحاج كرار (افووو) فى راجل بتضايرو (مرة) ؟
(فقال ليهم) لا لا ياجماعة الحكاية ما كدا ..
المشكلة فى (حق التمباك) تاني بجيني من وين !
اظن فى جماعة الاسبوع الفات سمعو حاجة (بالشكل ده) فى الخرطوم .
قبل ما انسى: —
اللهم الطف بالسودان واهله و رد كيدهم فى نحورهم يا قوي ياعزيز
واخيرا ….
قوموا الى وطنكم ايها الناس !
ولا تشتروا كل ما يعرض فى السوق هذه الايام .
الجمعة ٢١/ اكتوبر ٢٠٢٢م
