الخرطوم حترجع ..
للشاعر :-
إسحق الحلنقي
،،،،
ابشرو الخرطوم حترجع
بيها كل الدنيا. تسمع
ينهزم صوت البنادق
ويبقى صوت قمريه تسجع
،،،،
أرضها الخرطوم عظيمه
في جديده وفي قديمه
تعجبك قوة. وعزيمه
شعب ما عرف الهزيمه
ايد بتذرع وسيف بيقطع
،،،،،،،،
اسأل التاريخ عليها
المباديء الراسخة فيها
الشمس ما بين ايديها
والقمر خلقوهو ليها
قاشا يجري ونيلا يلمع
،،،،،،،،
المدارس بكره تفتح
والمزارع خيرها يطرح
والمصانع صوتا يصدح
الازاهر تبقى اسمح
تبقى أجمل وتبقى اسمح
،،،،،
تعجبك فيها الاصاله
الرجال صامدين رجالة
الأدب والفن رساله
والدهب حبات رمالا
وكل يوم خيرات بتطلع
،،،،،،،
