إستئجار النائحات
بقلم/ صبري محمد علي (العيكورة)
النائحات هى جمع نائحة و هى إمرأة إمتهنت البكاء والردحي كمصدر رزق والنائحة تؤتي بها الاسر الميسورة لاظهار حزنهم الذى فشلوا فى إظهاره للناس . والنائحة يتفاوت دخلها باليوم من عزاء لاخر وبحسب الوزن الاجتماعي والثراء فكلما زاد ثراء الميت و تعددت مآثره إزدادت اجرة النائحة . النائحة لها (عدة شغل) فالزي عدة و(الميك اب) عدة وكلما ازدادت حرارة العويل وغزارة الدموع واتقان الوصف تميزت النائحة واشتهرت . و للنائحة اسئلة جوهرية لاهل الميت لابد من معرفتها لتنجز المهمة بنجاح فاسماء الابناء والبنات سؤال والاملاك والعربات سؤال والاطيان والزراعة سؤال وعدد ونوع (السعية) سؤال وغير ذلك مما يدعم مآثر الفقيد .
طيب نطلع من الحتة دى واقول ليك لزوم الكلام ده شنو يا (عب باسط) …
تعرف يا صاحبي (الايامات دي) العم فولكر والقحاطة وجهة (مكس كده) خليط بين العسكرية والمدنية شغالين ايجار نائحات واقلام ! ما تعاين لي ما بقروشهم . الناقصهم شنو ؟
وقبل ما تقول لى المات منو
اسمعني ….
لم يمت احدا ولكن
الذى بدأ يحتضر هو مسودة دستور تسييرية المحاميين اللقيط بعد المعارضة القوية التى ما كانوا يتوقعونها لما عرف (بالتسوية بين اربعة طويلة والمكون العسكري) وان كان كل واحد فيهم ناكر الموضوع ده (خااالس) لكن الكلام حوله كثر ومافى دخان بلا نار
(طيب) …
وبما انه العم فولكر ومن يقف خلفه ماضين فى مخططتهم المسموم فقد بدؤا فى استئجار النائحات وبعض اقلام الارزقية حتى يبدو مشروعهم وكأنه حظي بإجماع وطني يمكنهم من تسويقه للعالم الخارجي وللمغفلين بالداخل لما تبقى من قطيع القحاطة (حلو الكلام؟)
و بحسب ما نشرته الكثير من المواقع (الايام الفاتن) فقد بدأ (الدفع) فعليا وبالدولار و يقال ان اختراقا كبيرا قد حدث لحزب عريق. ورغم ان هذا الحزب قد نفى و كذب فى بيان له ان يكون قد إستأجر اى من (نائحاته) لتأييد مسودة محاميي فولكر ولا غير فولكر …
(طيب) السؤال المهم (برأي) هو ان كانت اللجنة الغير شرعية و التى اعدت مسودة الدستور قد ابطلت بحكم قضائي يوم امس الاول ! وراحت فى (خبر كانا) فما هو مصير هذه المسودة ؟ وماذا يا تري العم (فولكر) ومن يقف خلفه فاعلين بعد هذا القرار (المصيبة) وهل سيتوقغون عن استئجار النائحات ام ان الامر (المنكور اصلا) قد مات داخل (الحضانة الملوثة) و (سيكبوا الزوغة) و يتبرأون منه تحت دعاوى ان الامر بيد السودانيين وما ثلاثية (فولكر محفوظ) الا مسهلا من المسهلات الدولية والطبية و …. و ….. !
ام لم يتبق امامهم الا ان يعلنوا خبر الوفاة ولكن كيف وتحت اى مبرر فهذا ما سنظل ننتظره بكل لهفة وشوق …
وغايتو ياجماعة انا جني ما جن الشمار الناقص ! يعني اتمني ان يكملوا جميلهم علينا و نسمعه (كولللو) ….
الدولارات ، اللقاءات ، الدولة المرطبة ، السفر ، القاهرة ، الحزب العريق ، مش عارف ناس كده قال ليك من حزب عريق آخر ، عرمان ، وجدي محل فلان ، و واحد مشاكس كده فى الحزب الشيوعي قالوا تجاوزه ، كاش واللا شيك ، سكان الحضر و اللا سكان الخلاء ! منو الكان هناك ومنو الدفع ومنو الاستلم !!
ياجماعة (ادونا) الشمار ده كاااامل ما تطلعوا روحنا ساكت !
التسوية وصلت وين ؟
ورونا الحاصل شنو ياخ!
قبل ما انسي :—
غايتو بعد كده الا تقلبوها عديييل . لكن طالما الكيزان ديل عايشين (حرررم) كان ختيتوها فى ضهر نملة (حا) يعرفوها (حا) يعرفوها .
الخميس ٣/ نوفمبر ٢٠٢٢م
