حفنات عمر ….
معجونه من فرحا معتق بالأمل
زهقت سريع من واقع الحال الحصل
فجت دروب الخيبات…
فتحت للعذابات الف باب..
اتوهط الزمن الكئيب…
اتفج قاعد بي مهل..
الكون غريب ظاليهو غيم
مكتسحو لون بس الزراق
عم السواد..
الكون لبس لون الحداد
والناس بعاد..
وبراك توطي في جمرتك
سمع صدي لي انتك
كل الغنيوات بي حزن
والقمري قوقي كمان حزين
حتي الكنار ردد تواشيح الرحيل
الدنيا حر صوت السموم عامل صفير
صدي الكلمة البتوجع ما بيروح
من بعدو كم تنقح جروح
والروح تروح
صاره الصبر..
حابسه الدموع…
تنافق الحس بابتسام
تدمع كتير والناس نيام
نصبت براها هناك خيام
بعيده من كل الأنام
تطلع تانس في القمر
تحكيلو بي كل التحس
يجن النجيمات يقعدن
زي الدميعات يبرقن
سمعن حواديت البشر
القمره تحتار شن تقول
كيفن تواسي هناك زول
صنقع إليها بكل خنوع
راجيها تمسح للدموع
حارت توقف دمعتو
قالت لو ما تخلي حزنك بيك يطول
عاين هناك تجد الحقول
هناك خضره ونيل طويل
هناك نجمه في كل ليل
وهناك أهالي بساط نضاف
البسمه فيهم زي ضفاف
بترسي في النفس السكينه
وترجع الأمل اللي راح
الدنيا ما بتحتاج كتير
ساهله وبسيطة ويوم قصير
شوف سكه الوجع القبيل
ادا القفا واتناسي ليها تقول حليل
عاين الزهور ورد الخميل
ما تقول هداك شوك الضريس
الدنيا بتشيل باليمين
تهديك كتير وتعوضك
التشه بتدور صبرا جميل
واللدغه الما ودتك القبر تحييك متين
افتح شراعك للصباح
جايكا خير من كل فج
الدنيا تضحك وتبسطك
اوعاكا تسكنك اليؤوس
خليك بشوش
ربك كريم ما ظلام عبيد
بتدبر امرك وينصفك
والشر بعيد منك يزح
موعود بصبرك تستريح
تهجد تنوم من دون ألم
وعدا صريح من سيد البشر
بجازي إحسانك حسن
جايك نصر جايك فرح جاياك سرور
يديكا لامن ترتضي وتنسي لكل الجروح
✍? رماح بشير
