Uncategorized
د. ليلى يعقوب تكتب : (ومضة أنثى)

د. ليلى يعقوب تكتب :
(ومضة أنثى)
عارفة ،،،
ما تخافي من الخوف ،،،
عيشي بيهو وإنت بطلة ،،،
البطل ماهو ال ما بخاف ..لا لا
البطل هو الرغم خوفو ، بيفضل لسه واقف ،،،
هو القادر يمشي وشايفين هنداك رجولوا بترجف ،،،
هو ال بيتقدم قدام خطوة وهو مرعوب ،،،
هو البتكلم ،ومن جوا قلبو بدق وريقو ناشف ،،،
هو البقدر يقول العايزو ، بي خوفو دا وعادي يقول أنا خايف ،،،
جازفي بي إنك تكوني جوووة الحاجات اللي إنت خايفة منها دي ، عشان كتير منها حيمشي منك ، لمن يشوفك بطلة،،،
جازفي بي إنك تكتبي عنك زييييي ما إنت ، بدون خوف..
وأدي حرية للناس الحولك إنهم يشوفوك زي ما عايزين ،،،
أديهم كل الحرية ،،،
وأكتفى بي شوفك أنت لي روحك ،،،
وخليك حضور دائما وإنت مبتسمة، في الحته الفاضية ال بتكون بين شوفك إنت لي روحك ، و شوفهم هم ليك مهما كان.
جازفي وطلعي إحساسك للناس الحولك ،،،
كان محبة أو غيرها ،،،
وأكشفي روحك ليك وليهم ،،،
هنا إنت (حية )جد جد ..
آي ح تاخدي دروس قاسية ، بس حتكوني النسخة الخفيفة الحية السمحة .
ما كل النجاح شهادات ..
مرات كتيييير النجاح بكون في إنك تكوني مع نفسك ، بتعرفيها وما بتحسي بالغربة وإنت معاها،،
في إنك قادرة تمسكي روحك من يدها ومستمتعة معاها بالرحلة وأكتشاف الحياة ،،،
خليك إنت وخليك بت أصيلة ليك إنت ،،،
لمي روحك عليك وعيشي تجربة الحياة بي خوفك دا ذاتو ، بس خليك بطلة.
يا أنومة
وبس يعني

