مظاهرات في شندي بسبب الولد ده ..
الطفل الجميل ده هو ولد (الشهيد بإذن الله) الأسد محمد صديق (من ياتو ناحية) ، أمبارح عمل عملية (فتاق) بمستشفي حامد عبد الرحمن بمنطقة ساردية الشقالوة بشندي.
الطفل ده عمل إنقلاب في القرية.
مظاهرات عديل.
كل سكان القرية لما عرفوا ده ولد محمد صديق تدافعوا نحو المستشفى.
رجال ونساء وأطفال وشباب وشياب .
قالوا المستشفى لو جدعت فيها إبرة بتقع في زول من شدة الزحم وتدافع الناس.
الأعمى شايل المكسر.
جايين للواجب.
المستشفى في تاريخها ما شهدت حضور قدر ده.
سكان القرية أي زول حلف يدفع قروش العملية.
عملوا زحمة في مكتب (الحسابات).
كل واحد يحلف يمين إنو (حق العملية عليهو).
وأي زول جا شايل معاهو حاجة (هدية ، وجبة أو حتى لعبات أطفال) .
إدارة المستشفى رفضت تشيل قروش من زول وعملت العملية مجان.
لا قرش لا تعريفة.
أسرة الراحل محمد صديق قابلت هذا الحب بالدموع والشكر العميق.
لما يكون أبوك بطل أنت ذاتك بتكون نجم ❤️
الحصل ده ما غريب علينا فهذا الشعب العظيم متفرد للحد البعيد ????????
أقسم بالله نتحدى العالم كلو لو في ناس زينا.
صاح نحن الآن بنتمزق كبلد لكن نحن كشعب عمرنا ما نتمزق.
ودي شندي ، وديل ناس شندي ، وشندي ما هي إلا نموذج لكل السودان العظيم.
الرحمة والمغفرة للراحل محمد صديق ونحسبه شهيد بإذن الله ، وكامل العافية والصحة لإبنه ولكل أفراد أسرته.
#محمد_الطيب_الأمين
