✒️??
(ياهوو الفضل) ….
حميدتي يرسم مستقبل التعليم
بقلم / صبري محمد علي (العيكورة)
]
تحت هذا العنوان كتب موقع (بقال برس) واظنه تبع (ولدنا) ابراهيم بقال ! الله اعلم حميدتي يرسم مستقبل التعليم فى السودان !
ما تعاين لى ياخ ده ياهو القريتو!
(اااي) ما فى مشكلة (الخال) يدعم وجبة الفطور واللا يبني فصول او مدارس ، يدعم المعلمين (مش عارف) يرقعك ببوكسي كده مرة واحده ما قلنا حاجة !
لكن يرسم مستقبل التعليم لا لا يا موقع (بقال برس) الكلام ده ما طبيعي وامكن يكون كتب تحت تاثير ال …. ( واللا بلاش)
حميدتي شنو يا جماعة ….
البرسم ليهو مستقبل تعليم ياجماعة كمان ماتسوقونا بالخلاء للدرجة دي ياخ . نعم عشنا وشفنا لمممن شفنا الخال رئيسا للجنة الاقتصادية وكووول شهادات الدكتوراة بتاعت المؤسس و وزير ماليتو ود البدوي يوم داك واقفين وراهو .
قلنا (ماشي) وللضرورة احكام و قلنا الكاش بقلل النقاش واوجدنا العذر للوقفة المستفزة للعلم واهل الاقتصاد .
لكن حكاية يرسم مستقبل التعليم عشان جاب ليهو وجبة فطور واللا كتاب دى بصراحة ما بتنبلع خااالس
قول لى قضيتك مع الزول ده شنو ؟
اقول ليك انا ….
اووول حاجة التعليم ده بحر واااسع وحقو زول ما متعلم واللا تعليمو نص كلتش كده يقيف بعيد يشيل الابريق بكل احترام توقيرا للعلم والعلماء . وبعدين دق الطار البلحييييل البسوا فيهو بعض الاعلاميين ده والله عيب فى حق من يمسك بقلم والله عيب جد . بعض الكتاب سابقا قالوا ان (الخال) ظاهرة كونية ستنقرض و طالبوا الناس بالصبر ويومها زعلنا ودافعنا عن الخال لكن بصراحة مننن يوم بدأ يشتت فى البكاسي الكلام ده بقى ما واقع لى نهااائى . عشان كده يا جماعة ما معقول كل يوم تورموا فشفاشنا بجنس الورنيش ده (قال يرسم قال)
احد الظرفاء مرة لقط ليهو جملة كده من بتاعات الخال من النوع ابو كديس ديك فاتصل بى مهاتفا وضاحكا فى ذات الوقت قائلا لى يا استاذ نحن السودانيين فهمناها تب و حميدتي ولدنا ومجبورييين عليهو لكن المحيرني الجملة دى يترجموها للخواجات كيفن !
عشان كده ياجماعة ونحن نحتفل مع معلمينا الاجلاء بيومهم العالمى ما تطمموا بطنا بجنس (الطار ده)
ما يخالف ياخ ….
الخال يرقع الادارات الاهلية ب الف وثلاثمائة (بوكسي) او يدي فلان مش عارف خمشة كده من الدولارات واللا الشغلانة ترطب معانا يقول لناس مكتبو نادوا لى عمنا (العيكورة) ده النبهلا معاهو كلو وارد لكن (كونو) يصبح فجأة (راسم) لمستقبل التعليم فى السودان !
القروش والعضلات ما كل شئ …
فقديما قال الشاعر العلم يرفع بيتا لا عماد له
والجهل يهدم بيت العز والشرف
يعني (عمنا) الشاعر ما قال الحكاية ضحاكات وبكاسي وكده قال (علمممم) فمن يفهم الخال ومستشاري الخال ان التعليم لا يحتاج لوجبة هنا وهناك ارفعوا يدكم عن ابائهم وفروا لهم سبل الكسب الشريف (اربطوا يد الفكي) من جباياته المتصاعدة فسيطعموا ابنائهم ويكسونهم ويعلمونهم ! اين الدولة ايها المستشارون اما تستحون ان تقودوا الاعلام ان يكتب عن (وجبة فطور) لنائب رئيس مجلس السيادة !
استحوا ايها النفعيون وانصحوا هذا (الرجل الطيب) اين ينفق اموال الدعم السريع !
والله لو كنت قاضيا لحاكمت البشير عن جرم واحد هو (صناعة حميدتي) و لكافأته عن بقية صنيعة طيلة سنوات حكمه
قبل ما انسى : —
ومن ما يسأل عنه المرء يوم القيامة عن ماله مما اكتسبه وفيما انفقه ..
الجماعة ديل ناسين اليوم ده واللا شنو؟
اللهم قد بلغت فاشهد
الجمعة ٧/ اكتوبر ٢٠٢٢م
