???
ده كلام شنو يا ريس ؟
بقلم/ صبري محمد علي (العيكورة)
]
نصدق كلام الفريق البرهان ثقة منا فى المؤسسة التى يقف على قيادتها .
نقرأ ، نتابع ، نربط الاحداث نحلل كلام (الفكي) المتزامن مع زيارة امريكا ، نتابع تصريحات القحاطة وفولكر الموضوع (ياكل معانا جمبة) !!
يا ريس ….
كل المؤشرات لا تتناسق مع تصريحاتكم بان لا تسوية ثنائية ! وفولكر يؤكد التسوية و الاعلام ابيضه واسوده يشير الى قرب توقيع التسوية بينكم وبين مركزي الحرية ! واهلنا دائما ما يقولون ان (السكات رضا)
يا ريس ….
ان كانت التسوية تمشي او تمضي على قدم وساق لتسليم الحكم لقحط (البائدة) على طبق من ذهب فيجب ان لا نفقد الشجاعة والمصارحة بتمليك الشعب الحقيقة .
يا ريس ….
حكاية (تطعيم) قحت ونكتبها بلغة كرة القدم بلاعبين جدد من المؤتمر الشعبي والطرق الصوفية وبعض الاحزاب التقليدية حتى يتسنى تجميل هذه التسوية (إن كانت حقيقة) لتبدو وكأنها اجماع وطنى توافقي فهذه لن تنطلئ على فطنة و وعى الشعب . اما ان كانت التسوية لا وجود لها وان ما يقال هو (كلام ساكت) فالتمضي للنقطة باء وانفى الشائعة بالعمل والقرار الملموس .
يا ريس ….
الوسط كله غبار ودخان وشيئا ما يطبخ وانتم صامتون ! فالى متى سعادة الفريق يظل الناس فى مثل هذا التوجس؟
وفى الاثر ياريس
ان ….
(وليد) ود السرة بت حاج عثمان ولد مدلع (خااالس) ويثير الفتن والمشاكل بالقرية ولان امه (لسانها طويل) فكان اهل القرية يتحاشون الصدام معها ويلجأون لوالده الرجل الطيب (حاج كرار ود الضو) .
فتجمع رجال القرية ذات يوم وذهبوا يشكون اليه ولده
فاستحى من انداده ولكنه كان صريحا معهم بقوله
(آآ جماعة انتو براااكم عارفين البير وغطاه)
دحين الكلام ده اعفوني منو !
ده كلام شنو آآ حاج كرار البتقولو فيهو ده افووو فى راجل بتضايرو (مرة)
(فقال ليهم) …
لا لا ياجماعة ما تفهمونى غلط الحكاية ما كده ! المشكلة فى (حق التمباك) تاني بجيني من وين ؟
يا ريس ….
بالله كل شئ ولا حق التمباك فلا ترهنوا قرارنا بسبب مقاطيع قحط
فالبشير كانت لديه (جزمة) علم بها العالم اجمع .
قبل ما انسى : —
ياريس (نجض شغلتك) فشعبك لن يخذلك
الخميس ٢٠/ اكتوبر ٢٠٢٢م
