الكاتب العراقي عادل الجبوري يكتب كل شي ممكن تشتريه او تتعلمه ؟؟ الاكل ، اللبس ، حتى الكتابة إلا الغيرة على الوطن… هاي ما تنشرا

كل شي ممكن تشتريه او تتعلمه ؟؟
الاكل ، اللبس ، حتى الكتابة

إلا الغيرة على الوطن…
هاي ما تنشرا

هاي فطرة
تنولد وياك مثل ما نگول “بلادي”
يا تكبر وتاخذ موقف يرفع راسك
يا تموت… وتصير تابع يصفق لغيره

الوطن مو مكان نعيش بيه
الوطن هو اللي يعيش بينا..
من “موطني” إلى “الفاتحة على الوطن”… شلون وصلنا لهنا؟

علمونا بالابتدائية، واحنا واقفين بالاستطفاف الصباحي، نردد:
موطني… موطني
وكنا أطفال، نرددها بدون ما نفهم شنو يعني “وطن”.

كبرنا…
وكبر ويانا السؤال: شنو الوطن فعلًا؟

بالإعدادية، صرنا ننشد:
راجعيلك يا وطن راجعين
نهديها لفلسطين، للقدس، لكل أرض مغتصبة…
وكان عدنا إيمان إنو الوطن فكرة ما تنباع، وكرامة ما تنكسر.

بس اليوم؟
الوطن نفسه صار صفقة.

فلسطين تباع،
القدس تساوم،
والعراق… صار ساحة تتقاسمها المصالح.

الوطن اللي كنا نغنيله،
ما عاد مثل ما عرفناه.
ولا مثل ما حلمنا بيه.

اللي استلموا الحكم،
ما حافظوا على الأرض…
ولا على المعنى.

وبين شعارات الأمس وواقع اليوم،
ضاعت “موطني”…
وصارت مجرد ذكرى.

الفاتحة…
على روح وطن،
انباع ببلاش. ؟؟
د. عادل الجبوري
صحفي وكاتب سياسي
أذار/٢٠٢٦