شواهد ومشاهد
🌹عبق الحياة🌹
(معلمي الزمن الجميل{1})
* سلام في كل مرة ، لكل جموع السودان الزنيين ، الحالة والشخصيات الحأطرق ليها بتلامس كل زول في أي مكان من ربوع بلدي ، بس مع تغيير للشخصيات ، كل المواقف بنلقاها متشابهه (كوبي) يعني بنتابك إحساسي أنا ذاتو ! ما تشيلو هم .
* طبعا مدينة (الحوش) جب كبير يحوي الكتير من المشاهد في السبعين أو التمانين .. زي القاعد في تلفزيون أبيض وأسود ، أو مصنقر في ضل ضحي بتسمع في حكاوي زمان ، وقدامك جك ليمون بااااارد ، أصلو لا بتمل ولا بتكل من الحجاوي .
* انت بتحاول تكتب ، وتقزقز بكلماتك . بتستمتع بالنضمي اللجواك ، وبتتخيل زي الرجعت الشريط لي ورا خااالص ، نكهة عتيقة ، شعور كل زول ، ماعون حكاوي الحوش واسع و كبير بالجد كبير ، لكن بحاول أشيل منو البكفيني ، واكتر من كدا ماداير ، لو انتو دايرين اكتبو لي في البوست تحت …
* نرجع شوية أو شويات ، ونحنا في المرحلة الابتدائية ، ياالله من ديك مرحلة ، منو الفينا ما إندسة من مدرس ؟ ، ومنو الما شال شنطة دموريه تتغسل كل خميس ؟ إلا اللهم ناس فريق الموظفين ناس خالد سراج الدين جابر .. (سراج جابر) الله إوسد الطوبه الفي قبرو ، معليش ناسي أغلبم مراحيم ، شوية وكدا ونديها زياره لمقابر ود تميم ، بس ماتخافوا وشيلو الصبر والحيين من(حي) يوم شكرم ما يجي .
* قصدت ابدا ليكم نضميني ب(بسراج الدين جابر) أول حاجه لانو ولدو صاحبي شديد .. وتاني حاجه لانو الكلام عن التعليم والمدرسين بنبداهو من فوق ، (جابر) رمز من الموجهين المرو على مكتب تعليم الحوش ، لانو بقي مننا وفينا وكمان أولادو ، عاشوا بيناتنا ، من نعومة الاضافرين يحدي بلوغم عتية ، ده كلام براو كمان …. نبقي في المهم (سراج الدين جابر) إسم نضيف ولامع بتجيك رهبه لمان تشوفو حتي لو من بعيد برغم مسكنتو ، مالى مركزو تماما واقمصتو بالمقاس ، أصلو خوفنا من المدرسين ! جايي من الناس الفوق ديل أمثالو وأمثال عمنا (نور القيوم تميم) ، ده كمان في الفريق عامل لينا إرهاب عديل كدا ، شوية كدا كانت أمريكا عملت فيو عقوبات ، ديل ياهم ؛ تصدق ! المدرسين في نفسم بعملو ليهم ألف حساب ونحنا التلاميذ ديل بنعمل للمدرسين مليون عربي … أصلو الحكاية توارديه … عشان كده التعليم ليو هيبه … طبعا نور القيوم الله يرحمو حضرتو في اللفه زمن( الناظر بشير فتح الرحمن المقاول) الله يرحمو .. مدير المدرسة الشرقية ، وعشان أوريكم التعليم زمان كان كيف وهسي كيف ، ح أحكي ليكم ، مره من المرات ، ده طبعا (في الأثر) ، جابو لينا تلميذ جديد لج .. مابذكرو … أبو كان ظابط في مركز الشرطة بعدين وبدون مانخش في التفاصيل ، مدرس من المدرسين جلدو .. مشى كلم أبو وعينك ماتشوف الا النور .. عربيه الشرطة بعساكرا ، جو خمو ليك المدرس وودوهو للقسم ، والضابط قال ليهو أوع اشوف ولدي تاني يدقه ، والمدرس مغلوب على أمرو عمل ساكت ، وأخونا الضابط افتكرا خلاص علي كدا والقصة إنتهت… اليوم التاني (الناظر بشير) نادا المدرس عشان يعرف الحاصل والإتحصل ، إستلم التقرير كامل غير منقوص … قام على حيلو ، وجاب التلميذ وقال للمدرس أجلدو وشال منو الكتب والكراسات .. الزمن داك مافي حاجة حقتك زي المرة الطلقوها تمرق بهدوما اللابساها ، أريتو زمنكم زمن بخيرو حتي الكراسات بصرفوها ليك والاقلام والحبر مابتجيب حاجه من بيتكم إلا مخلايتك تشيل فيها هتشك (ادواتك) ولوازمك .. المهم قال ليهو ماداير أشوف خلقتك دي تاني في المدرسة .. قام الضابط على شلاقتو رسل العربيه بتاعة الشرطة ، قايل كل مره بتسلم الجرة ، الما بتغبى على المدرسين واقفة قدام باب المدرسة ، عشان سيادتم اسوقوا الناظر !!!المرحوم طردم شر طرده ، وقال ليهم قولو للمرسكم :- … ناظر المدرسة مابمشي لزول في مكتبو .. دقيقة مافى الضابط قدام وش المدرسة .. قبل ما يتكلم ، قال ليهو الناظر :- … كل التلاميذ هنا في المدرسة ، واحد ماف فرق بين غفير ولا وزير وقوانين المدرسه بتمشي على الكل ، وولدك ده شوف ليهو مدرسة خاصة وانا كلمتا المدرسة التانيه بالحاصل ووصى إنو مايقبلو ( المدرسة التانيه الابتدائية الغربية ) البحيرني ، دي غربية ، وديك شرقية ، إتسمت علي أي أساس ، البعرف إورينا في الكومنتات ،،،
المهم صاحبك راسو دويش ، ماعارف إقبل وين ، بعد تحانيس وقومه وقعده وإعتزارات من ود مدني ، بقدرت قادر قدرو إعتمدوه وإمشي على العجين مايلخبتو … بالله عليكم شوفو نحنا كنا وين ؟ وبقينا وين ؟ من كبارا عامرانه … والغريق جاي ورا …
* ح أقوم اركز ليكم عن المعلمين ، طبعا أنا متخصص في المدرسة الابتدائية الشرقية لاني قريت فيها لكن ده مابمنع إنو اتناول ليكم معلمي المدرسة الغربية وحبة من مدرستي البنات (أ) و (ب) وحبه كمان من المدرسة المتوسطة بنين . معليش كلهم مراحيم .. ياخ ديل لو قلت إسم واحد ساي منهم كفاية ، في الجدية وحب التدريس والضبط والربط بس تقول في الكلية الحربية … ماتعرف تبدأ بمنو وتخلى منو ، مافي واحد منهم فيهو شخشخة ، بتلقى الصورة واضحة و نضيفة .
* لهم الرحمة جميعا لما قدموه من تعب وسهر ليالي ، أول ما جا في بالي ؛ الأستاذ الجليل طيب الله ثراء (صديق أحمد عثمان) معلم تحكي حيجوتو الأجيال والجغرافيا والتاريخ ،،،
في القولد إلتقيتو بالصديق أنعم به من فاضل صديقي … لحن غاير في الوجدان و لوحة مرسومة بي أنفاس المحنة والفصول ، شايلين القيم السمحة والذكريات الحلوة الما بنقدر ننساها .. (سراج الدين الزبير) الوقت داك شفتو يوم واحد لم جا من الانتداب وجاب للتلاميذ المميزين ساعات ، شفتو الإهتمام ده كيف ! (محمد الزبير) بنسمع بيهو لكن مابنشوفو بالله التقول في المجلس الاربعيني لانو ما من نفس المدرسة ، بيوت منسوجة ومغزولة بي ضو القمر ، كنا بتعلم منهم أكتر من ما بنعلم من بيوتنا ، والمرحوم (معتصم محمد) ، مدرسة البنات ، بتذكر النخلة السودا الفي وشو لي هسي ، عاملة فيو توازن رهيب ، والضحكة ياها ذاتا والعيون ، له الرحمة ؛ الوقت داك مدارس الأولاد كانت حصريا علي المعلمين ، والبنات للمعلمات مطعمة بمعلمين ، شغل نضيف باللجد كاني ماني …
* قصة الناظر القبيل و المعلم الحكيت ليكم عنو فوق ، المقصود بالمعلم المرحوم (عبدالعظيم جمال الدين) بتاع الفنون ، لكن عادي بدرس حاجة تانية ، لو حضر صفحات النت اليومين ديل كان إشتهر بعبدالعظيم تميم ، زي ما الناس عاملا ، نظام إختصارات وكدا ، حتى الأبهات بقو يحزفوهم عادي … قطع شك إحترام المعلمين من الوقت داك ووقف ، مازاد شبر ،، بقت الحالة واحده في الزمن ده .. تحشش ، تدخن ، ولا على بال أبوك ، وللحظة الفيها نحنا دي جيلنا لو صادفو معلم بالصدفة ، و شايل سجارة بطفيها في يدو ، شفتو القومة دي كيف ؟ ولا القومة ليك يابلد … تقول لى : (حمدوك) .
الحكاوي كتيرة عن المعلم والماعون ضيق ، والناس جارية وإتغير الوضع ، الوضع المجان .
بس ربك يهون .
تحقيق لرغبة أحد المتابعين (عمر أبواحمد)
ولنا لقاء في الجزء الثاني ،،،،،
هاشم تميم
0123701836
