شواهد ومشاهد
🌹عبق الحياة 🌹
( مواطن بس )
حقو الواحد اقول أنتن الحياة ، “بقينا نوصف الحاجات بالريح السمحة والريح الكعبة ما علينا” ، لانو الفهم أصابو التلف ، مش بقول ليك تليفه ، ياهو زاتو 🙃
ده كلو عشان في ناس بتقول ليك لا للحرب ، تصور !
في عجب أكتر من كدا ؟
* مافي حاجة إسما لا للحرب ، وده تبرير مافي محلو للواقع الشايفنو ده ، وراهو غايات مشبوهه ، وغرض ملوث عديل كدا …..
* نعم كلنا لا للحرب …..
لكن كيف ؟ 🤔
الحرب مابتقيف ، صدقني ما ح تقيف ، بأخوي وأخوك ، وعشان تقيف الحرب دي أحلام زلوط … بالمناسبة زلوط ده ديك هزيل مزلط منتوف الريش ،،،،،
* خليك فاكر إنت كمواطن لو في السودان أو في الخارج ، ماتقول خلاص قاعد في مكتب وبتشرب في سجاير ومتكيف ، العرجة لي مراحا ، خت في بالك …. عندك خيارين فقط …
يا إما مع الجيش … الديش ، دياشه ،
أو
مع الدعم السريع … هو زاتو اطلع شنو ؟ بتاع حميدتي واخوه.
ماعندك خيار تالت ما تكضب علي نفسك وعلى الناس المسكينة ….
* لو إفترضنا الدعم السريع إنتصر ح يحصل شنو ،،،، ابسطا ليك ،،،،،
لو انت فاكر إنو ح تجي حكومة مدنية بتكون غارق في سابع نومة … ولو انت فاكر ح يجي حمدوك مكان التعايشي تكون غلطان ولو فاكر التعايشي ذاتو ح يكون موجود ، بتضحك علي نفسك ….
إمكن في البداية يدوك أمل ويعشموك زي ما عشمو حميدتي ….
وبالحق نسيت ، حميدتي واخو “والله جنيتو على الطاحونة ” ديل ذاتم ح يعيشو الدور ، لفترة وشوف كلامي ده كان يقع الواطة ، بمشي ، وبجي … صاح حميدتي ولدة كيزان بالحيل (ولدة تلفانة) لكن برمجة أولاد زايد ياحليل زايد الخير النار تلد الرماد ، وده الفايت أضانكم …..
وبعد ده كلو بإختصار ح تمسك الأمارات كلبة إسرائيل زمام الأمر ، تجيب البتجيبو وتخلي البتخليهو على كيفا ، تجيب أمكعوك ، تجيب بت المهدي ، تجيب الفي بالا بمزاجه …. ماف زول بسألا، ماسايبة… إبشقت خلاص وظهر الكرباج..
* انت القبيل البتقول لا للجيش الفيهو أخوك وخالك وعمك ودعمك …ناس بالكوم مواطنين … ح تسف التراب وتقول ياريت وياليت ، وده كلو مابنفع …. لاخمننا جلابه ، ودهابه ، وعزابه ، العزاب أياهو جاي ، أديها نصنه 😕
* المشكله فيكم ماعارفين قيمة بلدكم ودايرين ناس بره ، يعالجو ليكم حاجاتكم ، ومغيبين تماما ، تأكد بانو ناس بره ديل مابعملو ليك حاجه ساي مجانا ، أي واحد فيهو داير يخت كراعو وخمش ليهو خمشة ، وانت مصدق غاشنك بالمدنيه والديمغراطيه والحرية والتقدمية ….
* والله طلعت زول دحش ساي ….
غاشي نفسك وغاشنك ،،، ومخدرنك مادايرنك تفيق دايرنك كدا تزوزي … يبقا من الساهل لو طلع الدجال ، قطع شك بتكون انت اول المريدين لانو طايوقك مبرمج مابتفكر ، وتفكيرك في حدود رجليك ….. وده العايزنو منك … لا للحرب وبس .. . الجيش كيزان …. والحيكومة عملت والحيكومة فرتقت ، ده الفالحين فيهو . والله …
بقيت انت والجنجويدي واحد .. جيزان جيزان ….
* خلاص ابقى مع الدعم السريع عديل كدا ، الطردك من بيتك وخلاك تمشي مصر وتمشي السعودية وتحوم الحوامة دي كلها ، وسرق عربيتك وأساس بيتك وقتل ، وقتل ، واغتصب ، واغتصب ، وحاجات تانيه حامياني ….
* والله كلام ياعوض دكام ، اريتك يادكام لو قاعد ، أبقو ختو كلامي ده ..حلقة … بكره تقولو الزول القصير ده صدق كلامو كلو حصل بضبانتو ……
* الناس دي كلها بقت بتاعين مصالح دول وأفراد … خليك واعي .. وأختار الحته البتريحك … كلو بي تمنو ..
“خليهو ياعديله النومة دي بتريحو شوية ”
وماعندي كلام تاني ….
ابقو عافيه …🌹🌹🌹🌹
مواطن وبس …
هاشم تميم ….
0123701836
